राजनीतिक दलहरुबीच मेलमिलाप र एकता आवश्यक रहेको : सत्यनारायण मण्डल

उत्सव आचार्य 

कञ्चनरुप सप्तरी  , २५ कात्तिक ।

नेपाल कम्युनिस्ट पार्टी ( नेकपा ) जिल्ला कमिटी सप्तरीद्वारा विजया दशमी , तिहार र छठ पर्वको अवसरमा आइतबार शुभकामना आदानप्रदान तथा चियापान कार्यक्रम सम्पन्न गरेको छ । 

राजविराजस्थित जिल्ला पार्टी कार्यालय मदननगरमा गरिएको चियापानमा नेकपा, नेपाली काँगे्रस, राजपाका नेताहरु, प्रतिनिधि सभा तथा प्रदेश सभा सदस्यहरु, स्थानीय तहका प्रमुख, उपप्रमुखहरु, प्रमुख जिल्ला अधिकारीसहित सुरक्षा निकायका प्रमुखहरु, विभिन्न कार्यालयका प्रमुख तथा प्रतिनिधि, शिक्षक, प्राध्यापक, कानुन व्यावसायी, पत्रकारहरु चियापानमा सहभागी भएका थिए ।
शुभकामना आदानप्रदान तथा चियापान कार्यक्रममा नेकपाका प्रदेश इन्चार्ज सत्यनारायण मण्डलले राजनीतिक दलहरु मिलेर ल्याएको परिवर्तनलाई संस्थागत बनाउँदै अघि बढाउन राजनीतिक दलहरुबीच मेलमिलाप र एकता आवश्यक भएको बताए । ‘सुखी नेपाली र समृद्ध नेपालको यात्रामा राष्ट्रिय एकता आवश्यक छ’ उनले भने ।
विकासमा पछाडी परेको तराईको दक्षिण क्षेत्रका प्रत्येक गाउँपालिकाका लागि सरकारले दुई करोडको बजेटसहितको स्पेशल प्याकेज छुट्याएकोमा प्रशंसा गर्दै प्रदेश सचिव सुमनराज प्याकुरेलले विकासको नयाँ लहर ल्याउन जनता जागरुक हुनु पर्ने बताउदै सामन्ती चिन्तनबाट  प्रदेश नम्बर २ रुमलिरहेको हुदा त्यो सोचबाट मुक्त हुने हो भने यो प्रदेशले हरेक क्षेत्रमा छलाङ मारि नेपालकै नमुना प्रदेश बन्ने विश्वास व्यक्त गरे ।  

बहुदलिय  व्यवस्थामा प्रतिपक्षको भूमिकालाई सत्तापक्षले महत्व दिनुपर्ने भन्दै नेपाली कांग्रेसका सभापति दिनेश यादवले राणा शासन र पञ्चायतकालदेखि संघीय लोकतन्त्र प्राप्तीको हरेक संघर्षमा साथै रहेकोले मुलुकको समृद्धि र विकासमा पनि सँगै रहने बताए ।
प्रदेश सभा सदस्य तथा राजपाका नेता नेत्रविक्रम साहले दुई तिहाई बहुमत प्राप्त नेकपाको सरकारले मधेस र दुई नम्बर प्रदेशका लागि काम गर्ने विश्वास राखेको बताए ।
प्रमुख जिल्ला अधिकारी सुरेन्द्र पौडेलले सुरक्षा विना विकास तथा विकास र समृद्धि विना सुरक्षित वातावरणको सम्भावना नरहेको भन्दै देश र जनताका लागि सबैले हातेमालो गर्नुपर्ने बताए । उनले विभिन्न अधिकारसहितको तीनै तहको सरकारले गतिका साथ पूर्ण तरिकाले काम गर्न थालेपछि मुलुकले पछाडि फर्कनु नपर्ने विश्वास व्यक्त गरे ।
कार्यक्रममा नेकपाका सहइन्चार्ज विश्वनाथ साह, पूर्व मन्त्री उमेश यादव, प्रतिनिधि सभा सदस्य सरिता गिरी, सभासद ताराकान्त चौधरी, राजविराज नगरपालिका प्रमुख शम्भु यादवलगायतले नेकपाको सरकारले अनुकुल अवसरको पूर्ण सदुपयोग गर्ने विश्वास व्यक्त गरे । 
केन्द्रीय सदस्य रामप्रित पासवानको अध्यक्षतामा सम्पन्न कार्यक्रममा स्वागत केन्द्रीय सदस्य अशोक मण्डलले तथा सञ्चालन कार्यदल सदस्य महेश यादवले गरे । कार्यक्रममा दुुई हजार भन्दा बढीको सहभागिता रहेको थियो ।

तपाईको प्रतिक्रिया

सम्बन्धित शीर्षकहरु

About the Author

KR NEWS

उहाँ KR News Portal (केआर समाचार पोर्टल)मा सम्पादक-इन-चीफ हुनुहुन्छ। उहाँ लाई संपर्क गर्नलाई र तपाईंको कुनै पनि लेख प्रकाशित गर्नलाई इमेल गर्नुहोस।
Email: krnewsportal@gmail.com